Jer 32 | MEU | STEP | Ina hereva na Iehova ena amo Ieremia enai e kau, Sedekia, Iuda pavapavana, ena lohia laḡanina ihagvautana ai. Una na Nebukadresara ena lohia laḡanina ihagwauta-taurahanina.

Jeremiah 32

Ieremia ese tano ta e hoia Anatoto ai

1 Ina hereva na Iehova ena amo Ieremia enai e kau, Sedekia, Iuda pavapavana, ena lohia laḡanina ihagvautana ai. Una na Nebukadresara ena lohia laḡanina ihagwauta-taurahanina. 2 Una negana ai Babulono pavapavana ena tuari oreana ese Ierusalem vada e daia heḡeḡe; bona peroveta tauna Ieremia na hegima taudia edia magu lalonai vada e hekou, Iuda pavapavana ena ruma ai. 3 Badina be Sedekia, Iuda pavapavana, ese vada e koua ahu, eto, Badina be dahaka o perovetamu, o tomu, Iehova ini e gwau tomamu: A itaia, lau ese ina hanua na Babulono pavapavana imana ai na atoamu, ia ese baine abia; 4 bona Sedekia, Iuda pavapavana, na Kaldea taudia imadia amo basine roho mauri diba, a ia na momokani Babulono pavapavana imana ai baine heato, ia ida hevaira-hehenidia ai bae hereva heheni bona bae heroha heheni. 5 Bena ia ese Sedekia na Babulono baine laohaia, unuseni ai baine noho ela bona lau ese baina vadivadi henia; Iehova na e herevamu. Ena be Kaldea taudia ba tuari henidia to basio kwalimu.

6 Ieremia eto, Iehova ena hereva na egu ai e kau, eto, 7 A itaia, Hanamele, tamamu lahaina Salumu natuna, na baine vasi, baineto “Egu tano Anatoto ai, Beniamina tanona ai, ba hoia, badina be iabi-taona siahuna na oiemu ai”. 8 Bena tadikakagu Hanamele na dekegu ema, hegima taudia edia magu ai, Iehova ena hereva heḡereḡerena ai, e hereva henigu, eto, Egu tano Anatoto ai, Beniamina tanona ai, ba hoia, badina be iabina mai siahuna tauna na oi; ba hoia emu. Bena na diba una na Iehova ena hereva.

9 Bena una tano Anatoto ai na tadikakagu Hanamele ena amo na hoia, moni na hahetohoa, na henia,silver sekeledia gwauta-hitu. 10 Ladagu na tano ibiaguna pepana ai na torea, na koua kunuka-kunuka, bena kara ihamomokanina taudia na abidia, bona moni na metau ihahetohona ḡauna ai na hahetohoa. 11 Bena hari tano ibiaguna pepana, e koua kunuka-kunuka ḡauna, bona ia ida-idana pepana ta, e hulala ḡauna, na abidia; 12 bena hari tano ibiaguna pepana na Baruku, Neria Mahaseia natuna, na henia, tadikakagu Hanamele vairanai, bona kara ihamomokanidia totona ladadia na una pepa ai e tore taudia vairadiai, bona Iuda taudia, hegima taudia edia maḡu ai e helaiva taudia, iboudiai vairadiai danu. 13 Idia vairadiai Baruku na haḡania, nato, 14 Iehova Sabaota, Israel Diravana, na ini e gwau tomamu: Ini tano ibiaguna pepadia, hari e koua kunuka-kunuka ḡauna, bona hari e hulala ḡauna danu, avabidia, hodu ta ai ba udadia, bae mia daudau helaoreana. 15 Badina be Iehova Sabaota, Israel Diravana, na ini e gwau tomamu: Ruma bona tano bona vine imeadia ma bae hoi lou ina tano ai.

16 Hari tano ibiaguna pepana na Baruku Neria na henia murinai, lau ese Iehova na ḡuria, nato, 17 Ḡaubada Iehova e, oi ese guba bona tanobada na emu siahu badana bona imamu hetoi-rorona amo vada o kara. Ḡau ta na dia auka oiemu; 18 oi na daha daha o bogadia hisimu, a tama edia kerere davadia na muridiai natudia o henidiamu. Dirava badana, Siahu Diravana e, oi ladamu na Iehova Sabaota; 19 emu hahealo na bada, bona emu kara na mai siahudia; oi matamu e papamu, taunimanima edia kara iboudiai o itadiamu, ta ta ena dala ena dala bona ena kara anidia ena kara anidia heḡereḡeredia davadia o henidiamu. 20 Oi ese toa bona hoa karadia na Aigupto tanona ai vada o hahedinarai, bona Israel ai bona taunimanima iboudiai bogaragidiai danu, ema bona ina dina; bona sibomu ladamu vada o hadaea ina dina ai. 21 Oi ese emu bese Israel na Aigupto tanona amo o hakaudia lasi, mai toa bona hoa karadia, bona mai imamu goadana, mai imamu hetoi-rorona, bona mai hahegari badana ida. 22 Ina tano danu vada o henidia, senedia o gwau henidia hamata ba henidia oto tanona, rata bona bada ranuna e arumu tanona; 23 bena e raka vareai, e ḡaunaia. A idia na oi eremu asie kamonai, bona oiemu taravatu ai asie raka; o haganilaidia karadia iboudiai na ta asie karaia. Una dainai ina dika idoinai na idia latadiai vada o hadihoa. 24 A itaia, tano vada e senua, hanua badana iabina totona, bena dare bona doe bona dai-hanai gorerena daidiai hanua na Kaldea taudia, e tuari heniamu taudia, imadia ai vada e atoa. O gwaurai herevadia anidia vada e vara, bena vada o itaia. 25 A oi, Ḡaubada Iehova e, vada o hamaorogu, oto, Ena be hanua na Kaldea taudia imadia ai vada na atoa, to oi ese tano na moni amo ba hoia, kara ihamomokanina taudia danu bavabidia.

26 Iehova ena hereva na Ieremia enai e kau, eto: 27 A itaia, lau na Iehova, mauri ḡaudia iboudiai edia Dirava. Kara ta na auka herea, bena basina karaia diba a? 28 Taunabunai Iehova ini e gwau tomamu: A itaia, lau ese ina hanua na Kaldea taudia imadia ai bona Nebukadresara, Babulono pavapavana, imana ai baina atoa, bena ia ese baine abia. 29 Kaldea taudia, ina hanua e tuari heniamu taudia, na baema, ina hanua na bae daea, bae doua; guhidia ai muramura mai bonana na Baal e gabu henia bona inuinu bouboudia na dirava idaudia e bubu henidia bena unu amo e habadugu rumadia danu bae dou. 30 Badina be Israel garana bona Iuda garana na kara dikadia mo vada e kara lau vairagu ai, merodia negadia amo, Israel garana imadia ḡaukaradia na lau ihabadugu karadia mo. Iehova na e herevamu. 31 Ina hanua ese egu badu bona egu lalo-siahu vada e havaradia, e haginia dinana amo ema bona ina dina, una dainai lau ese vairagu amo baina abia oho, 32 Israel garana bona Iuda garana edia kara dika iboudiai daidiai. Idia ese lau ihabadugu karadia e kara: edia pavapava bona edia lohia, edia hahelaḡa taudia bona edia peroveta taudia, Iuda taudia bona Ierusalem inoholaina taudia ese. 33 Idia ese vada e gini muri henigu, asie vaira henigu. Ena be na hadibadia havara-havara to idia ese hahediba herevadia na asie hakala henidia. 34 Edia ḡau dika-rohorohodia na e haginidia, lau ladagu e henemailaia dubuna lalonai, bae hamiroa totona. 35 Baal ena atai gabudia helagadia e larebadia, Hinom natuna ena koura ai, natudia mamaruanedia bona hahinedia na boubou ḡaudia ai bae halaodia totona, Molek ena. A lau ese asina haḡanidia bona asina laloa idia ese una kara dika-rohorohona amo Iuda taudia bae hakaradia dika.

36 Taunabunai, ina hanua, umui ese o herevalaiamu, o tomu “Dare bona doe bona dai-hanai gorerena amo Babulono pavapavana imana u vada e atoa”, hanuana na Iehova, Israel Diravana, ese ini e herevalaia tomamu: 37 A itaia, egu badu bona egu lalo-siahu bona egu lalo-garagara bada-herea lalonai na luludia lao tanodia iboudiai amo ma baina haboudia lou; baina loulaidia ina gabu ai, bona baina hanohodia namonamo. 38 Idia na lauegu bese ai baela bona lau na edia Dirava ai bainala. 39 Lalo tamona bona dala tamona baina henidia, bena lau bae gari henigu hanaihanai, idia bona muridhi natudia danu ihanamodia. 40 Lau ese egu gwauhamata baina henidia hanaihanai, bainato, idia ihanamodia karadia amo basina raka siri; bona lau garigu na lalodia ai baina atoa, egu amo basie raka siri helaoreana. 41 Idia ihanamodia karadia baina moalelaidia, bona heabidadama ai ina tano ai baina hadaidia, mai lalogu idoinai bona mai laumagu idoinai ida.

42 Badina be Iehova ini e gwau tomamu: Ina dika badana idoinai na ina bese taudia latadiai vada na hadihoa heḡereḡerena, lau ese danu na gwauhamatalai henidiamu kara-namodh iboudiai ma baina hadiho. 43 Ina tano, umui ese o herevalaiamu, o tomu “Ia na vada e vahu, asi tauna bona asi ubu-ubu ḡauna; Kaldea taudia imadia ai vada e atoa”, tanona lalonai inogo vada ba hoi; 44 Inoḡo na moni amo ba hoi, bona tano ibiagudia pepadia ai ladamui ba tore, bena ba koudia kunuka-kunuka, bona kara ihamomokanina taudh ese bae hamomokanidia, Beniamina tanona ai, bona Ierusalem hetabirana ai, bona Iuda hanuadia ai, bona ororo kahadia hanuadia bona taora hanuadia bona diho kahana hanuadia ai; badina be edia noho ma baina hanamoa lou. Iehova na e herevamu.